دكتور عوض الله مطر، أيقونة عطاء انساني سوداني بالرياض

دكتور عوض الله مطر، أيقونة عطاء انساني سوداني بالرياض

صحافة المواطن
تلقت شبكة وادي النيل الإخبارية ضمن إطلالتها في صحافة ة المواطن، رسالة مؤثرة عن عطاء وإنسانية طبيب سوداني بالرياض، ننشرها حسب ورودها لنا، ودون أي مسؤولية في ذلك، نص الرسالة :
(البوست دا ما عارف أبداه كيف والله من كمية المشاعر المداخلة مع بعضها 💛

وكل يوم نحن بنثبت لنفسنا وللعالم إنو والله نحن السودانين فينا خير والخير الفينا دا فطرة من ربنا عدييل كدا ..”

معاي واحد صحبي مريض ونحن في الرياض السعودية .. فمشينا مستشفى مشهور شديد في الرياض ومن أضخم المستشفيات المعروفة ..”

سلمنا علي الرسبشن .. وأستفسرنا عايزين لينا أخصائي جراحة عامة لو موجود عندكم ..”

قالو موجود إتفضلو العيادة علي يمينكم ..”

قلت لصحبي دا .. الفاتورة كيف ؟ ندفع وين ولا الزولة دي نست ولا الحاصل شنو ؟

اها أنا خايف الفاتورة الما بتكون معانا حقها ديك .. فجيت للبت لو سمحتي .. ندفع وين للمقابلة .. والحاجات دي ..؟

قالت لي إنتو سودانين .. مجان مقابلتكم ..💛

أي أنا أستغربت زي ما إنت إستغربت كدا !!

نعم ؟ مجان كيف ؟ وعشان نحن سودانين ؟!!

تخيلو قالت لي شنو ؟ وردها كان شنو ؟

حضرتك دكتور عوض الله مطر من بدت الحرب عندكم أي سوداني يجيه بدخلو مجان وما بشيل منو ولا ريال 💛

عارف لما تحس إنك فخور إنك سوداني رغم الحاصل ؟
والله دا الحسيتو بالضبط 💛
والله رغم الحاجات التافهة البصدرها الإعلام عندنا والسخافات البنشوفها في السوشال ميديا إلا إنو ديل بالجد الناس البنستحق نظهرهم ويكونو قدوتنا 💛

وأنا بقيت متشوق اشوف دكتور عوض مطر دا .. وسبحان الله دخلنا عليه وأول شي شكرتو واتونست معاه 💛

قال لي السودانين الفي الحرب جو هنا بأسرهم والأوضاع صعبة ودا البقدر أساهم بيه لبلدي وأولاد بلدي 💛

لا وما كدا بس .. الدكتور طارح مبادرة إنو لو أي أسرة سودانية إتواصلت معاه في الرياض هنا بمشي ليهم في البيت تخفيفاً للمصاريف عليهم 💛

قال لي المغتربين إتنين .. يا جاب أسرتو هنا ومع الحرب قاعدين هنا بالغصب .. فديل إن شاء الله اوفر ليهم حق المقابلة لمعيشتهم .. ”
أو مغترب هو مريض وأسرتو هناك محتاجة وإن شاء الله أوفر ليه مصاريف أسرتو 💛💛

ويا جماعة مستر عوض إستشاري الجراحة العامة ومع شغلو وضغطو مشى وزار كم أسرة سودانية إتواصلو معاه في الرياض ونقل عيادتو من المستشفى لزيارتهم في البيت 💛

لا وما كدا بس .. عامل قروبات للأطباء السودانين في السعودية .. وأي مدينة فيها دكتور سوداني وفيها سودانين حتخش مجان وممكن يجوك في البيت يعالجوك وبدون ما تدفع ولا جنيه 💛💛

وهو بحكي لي .. ما عارف إني حذيفة النعيم .. ولا عارف إني شغال شنو ؟ ولا برفع حالات ولا الصفحة دي فيها شنو ؟

إلا بعدما جات دكتورتين كدا سودانيات ولقوني قاعد معاهم .. فيهم واحدة متواصل معاها انا وهي ما عارفاني بخصوص عملية لزول بعرفو 😂😂
والدكتورة التانية قالت لي شكلك دا ما غريب علي 😂😂

وحصلت المعرفة وعيييك إنت جادي وضحكنا وقسماً برب الناس حسيت إني قاعد مع أسرتي وإحساس فخر كدا عجيب يااخ 💛💛

والدكتور حكيت ليه إني حنشر البوست دا وحخت رقمو للأسر السودانين وللأطباء الفي المدن الممكن يضيفهم للقروب ..”

ودا كلو كووم طبعاً وطلع الدكتور أخو صحبي صلاح مطر 😂😂💛

دا كلو حصل بالصدفة كدا طبعاً وبدون ترتيب 💛💛

ربنا ساقني وجابني لدكتور عوض في مكانو 💛
عشان انشر ليه البوست دا .. وعشان نثبت للعالم كلو إنو دي الأمثال المفروض تطلع للناس وللشعب وللعالم عننا ..”

ناس كفاءات وناس عابرين في مجالهم وناس نعتز ونفتخر إننا بنعرفهم والله 💛

وتكريماً لدكتور عوض الله مطر .. وإثبات مننا إنو ما التافهين المحتواهم جسمهم هم البمثلونا نحن السودانين .. البوست دا عايزو يلف العالم كلو .. وما تطلع من البوست دا إلا وإنت مشاركو عندك ولا ناسخو وناشرو عندك 💛💛

وبالجد والله شكراً دكتور مطر 💛

حسيب ليكم رقمو للتواصل واتس .. إذا عندك زول مريض في السعودية في الرياض أو برا منها الدكتور وأصحابو جاهزين بإذن الله 💛💗💓♥️❤️💞💕💖💝😍🤩

0906002767)

اجتهادات شبكة وادي النيل الإخبارية في معلومات الرسالة

تحصلت شبكة وادي النيل الإخبارية على صفحة دكتور عوض الله مطر الرسمية وعنوانها:

https://www.facebook.com/share/KnNvZir2JABdS52V/?mibextid=qi2Omg

كما تحصلت شبكة وادي النيل الإخبارية على رسالة من دكتور مطر، يعبر عن استعداده بأن تكون صفحته وكل الوسائط الاجتماعية التي تخصه، متاحة بالمجان لأي استشارات طبية وخاصة للجالية السودانية التي قدمت مؤخرا واستقرت بالرياض، نص الرسالة :

(في هذه الظرف الحسّاس الذي يمرّ به السودان. أعلن عن صفحتي هذه صفحة إستشارة عامّة مجّانية لكافة السودانيين ، داخل و خارج المملكة العربية السعودية.لعلمي أن هنالك الكثير من الأسر السودانية ، استقبلت زائرين ومعتمرين، منهم من قد احتاج لعناية طبية عاجلة ، و كثير منهم قد يواجه عقبة أهلية العلاج أو تغطية التأمين الصحّي. أنا متواجد بمدينة الرّياض و متاح للتواصل مع الجميع عبر جميع وسائل التواصل، و جميع إمكاناتي المتواضعة و علاقاتي متاحة و مسخرّة في خدمة من يحتاجها،و لن آلو جهداً في أي نصح أو مشورة طبية، أو الإشراف الشخصي على العلاج حسب دائرة تخصصي و معرفتي)